Datblygiad Proffesiynol a Hyfforddiant Athrawon

Rydym yn darparu ystod eang o gyfleoedd i godi ymwybyddiaeth am ddyslecsia mewn lleoliadau ffurfiol ac anffurfiol.

Oherwydd ein cysylltiad â'r Ysgol Seicoleg yn yr Ysgol Gwyddorau Dynol ac Ymddygiadol, mae ein Gwasanaeth Addysgu hefyd yn falch o fod â rhan weithredol mewn hyfforddi myfyrwyr sydd â diddordeb mewn addysg, ac sydd ag arbenigeddau mewn hyfforddi iaith a llythrennedd. Mae ein myfyrwyr wedi dod yn rhan werthfawr o'n gweithgareddau addysgu.

Rydym yn cynnig y gwasanaeth canlynol yn y ganolfan:

Amrywiaeth o gyrsiau wedi eu hachredu gan Gymdeithas Ddyslecsia Prydain ar gyfer athrawon cymwys a gweithwyr proffesiynol eraill sy'n gweithio ym maes addysg

Mae Canolfan Dyslecsia Miles wedi'i hachredu gan Gymdeithas Ddyslecsia Prydain i ddarparu cyrsiau datblygiad proffesiynol i athrawon.

Athrawon Cyswllt / Ymarferwyr Cynorthwyol: Cwrs Astudiaethau Proffesiynol Pellach mewn Anawsterau Dysgu Penodol / Dyslecsia - cwrs blwyddyn hunangynhwysol sy'n cael ei redeg fel modiwl yn y rhaglen MA rhan amser. Cynhelir y cwrs rhan-amser hwn ar y cyd ag Ysgol Addysg Prifysgol Bangor ac mae angen mynychu ar 5 penwythnos yn ystod y flwyddyn academaidd; mae angen 40 awr o astudio ac mae'n cynnwys elfen ymarfer dysgu o 20 awr o addysgu unigol yn ardal leol y myfyriwr. Caiff hyn ei oruchwylio gan diwtor personol a recordir y gwersi.
Ar ôl cwblhau'r cwrs yn llwyddiannus gall myfyrwyr wneud cais i Gymdeithas Ddyslecsia Prydain am Statws Athro Cymeradwy neu Statws Ymarferydd Cymeradwy. Fe'u cydnabyddir wedyn yn athrawon dyslecsia arbenigol.
Aelodaeth Gyswllt gyda Chymdeithas Ddyslecsia Prydain: Dau fodiwl ar Ddyslecsia: Theori ac Ymarferol, ac un ar Asesu yn y rhaglen Diploma/Meistr Ôl-raddedig rhan amser, hefyd wedi ei chynnal ar y cyd ag Ysgol Addysg Prifysgol Bangor. Mae hyn yn gofyn mynychu 5 penwythnos yn ystod y flwyddyn academaidd gyda’r cwrs yn para dwy neu dair blynedd, yn dibynnu ar gylch y modiwlau. Mae'n gofyn am 90 awr o astudio ac mae'n cynnwys elfen ymarfer dysgu o 30 awr o addysgu unigol yn ardal leol y myfyriwr. Goruchwylir hyn gan diwtor personol a chaiff gwersi eu recordio. Mae'r modiwl Asesu hefyd yn gofyn i'r athro gynnal asesiad gyda rhywun yn ei arsylwi. Gellir recordio’r asesiad.
Ar ôl cwblhau'r tri modiwl yn llwyddiannus, gall myfyrwyr wneud cais i Gymdeithas Ddyslecsia Prydain am aelodaeth gyswllt ac am Dystysgrif Ymarfer Asesu. Fe'u cydnabyddir wedyn yn athrawon ac aseswyr arbenigol.
O dan y rheoliadau cyfredol, mae athrawon sydd ag aelodaeth gyswllt o’r Gymdeithas, a Thystysgrif Ymarfer Asesu, yn cael eu cydnabod gan y Cyd-Fwrdd Arholi fel rhai sy'n gymwys i asesu disgyblion sydd angen trefniadau arbennig ar gyfer profion TASau, arholiadau TGAU a'r Lwfans i Fyfyrwyr Anabl.
Nid yw'n ofynnol i'r rhai sy'n dymuno cofrestru ar y cyrsiau uchod feddu ar Statws Athro Cymwysedig ond bydd angen dwy flynedd o brofiad addysgu amser llawn (neu'r hyn sy'n cyfateb i hynny) yn yr ystafell ddosbarth. Ymholiadau i Joanna Dunton, Cydlynydd y Gwasanaeth Addysgu.

Gweithdai a sesiynau hyfforddi i rieni, ysgolion unigol ac Awdurdodau Addysg Lleol drwy drefniant

Os ydych chi'n ystyried pecyn/diwrnod hyfforddi, cysylltwch â ni i drafod eich gofynion. Mae sesiynau pwrpasol yn cael eu datblygu â chryn ofal i dargedu eich gofynion penodol.

Mae sesiynau o’r fath wedi cael eu cyflwyno i Heddlu Gogledd Cymru, Awdurdod Addysg Lleol Sir Ddinbych, ysgolion lleol, grwpiau rhieni a Sylfaen ymhlith eraill.

I gael rhagor o wybodaeth neu i drefnu sesiwn, cysylltwch â ni ar 01248 382203/383618 neu e-bostiwch dyslex-admin@bangor.ac.uk.

Cyngor a gwasanaeth ymgynghori i rieni, athrawon ac ysgolion

Cysylltwch â ni ar 01248 382203/383618 neu e-bostiwch dyslex-admin@bangor.ac.uk.